អ្នកទេសចរតាមនាវា Westerdam បង្ហោះសារដ៏អស្ចារ្យថា «ទោះរូបកាយត្រូវឃ្លាតឆ្ងាយ តែបេះដូង និងចិត្តនៅតែមិនអាចបំភ្លេចកម្ពុជាបាន»

(ភ្នំពេញ)៖ ស្រ្តីបរទេសម្នាក់ ដែលជាអ្នកដំណើរតាមនាវាទេសចរណ៍ Westerdam បានសរសេរលើបណ្តាញសង្គម Twitter របស់នាងថា ទោះរូបកាយត្រូវឃ្លាតឆ្ងាយ តែបេះដូង និងចិត្តនៅតែមិនអាចបំភ្លេចកម្ពុជាបាន។

ស្រ្តីម្នាក់នេះ មានឈ្មោះនៅក្នុងបណ្តាញសង្គម «AJ» បានសរសេរបញ្ជាក់ថា៖ «ច្បាស់ណាស់ថា ត្រូវចំណាយពេលច្រើនដើម្បីបរិយាយពីទង្វើល្អរបស់ប្រជាជនកម្ពុជា បានធ្វើមកលើពួកយើង ទាំងមិនដែលស្គាល់ពួកខ្ញុំសោះ ប៉ុន្តែគេបានធ្វើដូចជាគ្រួសារពួកគេ។ ឆាប់ៗនេះ ខ្ញុំនឹងចាកចេញពីកម្ពុជា តែបេះដូង និងចិត្តខ្ញុំនៅតែមិនអាចបំភ្លេចកម្ពុជា»។

នាវាទេសចរណ៍ខ្នាតយក្សរបស់អាមេរិក Westerdam បានចូលសំចតនៅកំពង់ផែក្រុងព្រះសីហនុ នាព្រឹកថ្ងៃទី១៣ ខែកុម្ភៈ ឆ្នាំ២០២០ ក្រោយទទួលបានការអនុញ្ញាតពី សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។

នាវាយក្សនេះ ដឹកមនុស្សសរុបជាង ២២០០នាក់ ក្នុងនោះអ្នកដំណើរ១៤៥៥នាក់ និងបុគ្គលិកកប៉ាល់ចំនួន ៨០២នាក់ បានចាកចេញពីទីក្រុងហុងកុង ប្រទេសចិន កាលពីថ្ងៃទី០១ ខែកុម្ភៈ ឆ្នាំ២០២០ ប៉ុន្តែត្រូវបានអាជ្ញាធរ កោះតៃវ៉ាន់ ហ្វីលីពីន ជប៉ុន កូរ៉េខាងត្បូង កោះហ្គាំ(អាមេរិក) និងប្រទេសថៃ បដិសេធមិនឲ្យចូលចតឡើយ ដោយសារតែការព្រួយបារម្ភថា ក្នុងចំណោមមនុស្សរាប់ពាន់នាក់នៅលើនោះ អាចមានផ្ទុកវីរុសកូរ៉ូណាថ្មី (Covid-19)។

បន្ទាប់ពីបានចូលចតនៅកំពុងផែព្រះសីហនុ និងឆ្លងកាត់ការត្រួតពិនិត្យសុខភាព អ្នកទេសចរទាំងនោះ ត្រូវបានរាជរដ្ឋាភិបាលកម្ពុជាអនុញ្ញាត ឱ្យធ្វើដំណើរកម្សាន្តដោយសេរី នៅក្នុងប្រទេសកម្ពុជា ឬចាកចេញតាមជើងយន្តហោះ បើសិនជាពួកគេចង់ចាកចេញ។

ស្ថានទូតប្រទេសជាច្រើនទាំងអាមេរិក និងអឺរ៉ុប សុទ្ធតែបានថ្លែងអំណរគុណ និងកោតសរសើរចំពោះ ទឹកចិត្តរបស់រាជរដ្ឋាភិបាលកម្ពុជា ក្នុងការជួយដល់នាវាយក្សនេះ ឱ្យចុះចត៕