ថ្ងៃអង្គារ ១៤ រោច ខែទុតិយាសាឍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៥ ខែសីហា ឆ្នាំ២០២៣

នៅក្នុងឱកាសដ៏មង្គលាភិរម្យប្រសើរថ្លៃថ្លា នៃពិធីចម្រើនជន្មាយុរបស់ សម្ដេចកិត្តិសង្គហបណ្ឌិត នៅថ្ងៃទី១៥ ខែសីហា ឆ្នាំ២០២៣ នេះ តាងនាមថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ព្រះសង្ឃ ប្រជាពលរដ្ឋទូទាំងខេត្តកណ្តាល និងក្នុងនាមខ្លួនខ្ញុំបាទផ្ទាល់ ព្រមទាំងភរិយា និងក្រុមគ្រួសារ សូមសម្ដែងនូវ អំណរសាទរ ប្រកបដោយសេចក្តីសោមនស្សរីករាយ និងសូមគោរពជូននូវសព្ទសាធុការពរជ័យ បវរមហាប្រសើរគ្រប់ប្រការ ជូនចំពោះ សម្តេចកិត្តិសង្គហបណ្ឌិត សូមបានប្រកបដោយសុខភាពល្អ បរិបូរណ៍ កាយពលមាំមួន ប្រាជ្ញាឈ្លាសវៃ និងជន្មាយុយឺនយូរដើម្បីបន្តគាំទ្រដល់ការដឹកនាំរបស់ រាជរដ្ឋាភិបាលឱ្យសម្រេចបាននូវជោគជ័យថ្មីៗ បន្ថែមទៀត។

ជាថ្មីម្តងទៀត យើងខ្ញុំទាំងអស់គ្នា សូមលំឱនកាយវាចារចិត្ត សូមលើកហត្ថប្រណមបួងសួងដល់គុណ បុណ្យព្រះរតនត្រ័យ កែវទាំងបី វត្ថុស័ក្តិសិទ្ធិ ទាំងឡាយក្នុងលោក សូមតាមជួយអភិបាល ថែរក្សាការពារ ប្រោសព្រំសព្ទសាធុការពរជ័យជូន សម្តេចកិត្តិសង្គហបណ្ឌិត និងក្រុមគ្រួសារ សូមប្រកបដោយពុទ្ធពរ ដ៏ប្រសើរថ្លៃថ្លាទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។