កងទ័ពជើងទឹកនិងនាវាចម្បាំងរបស់សហរដ្ឋអាមេរិក ប្រទេសជប៉ុននិងកូរ៉េខាងត្បូង បានធ្វើសមយុទ្ធរួមគ្នាយ៉ាងគគ្រឹកគគ្រេងនៅក្នុងដែនសមុទ្រភាគខាងលិច

កងទ័ពជើងទឹកនិងនាវាចម្បាំងរបស់សហរដ្ឋអាមេរិក ប្រទេសជប៉ុននិងកូរ៉េខាងត្បូង បានធ្វើសមយុទ្ធរួមគ្នាយ៉ាងគគ្រឹកគគ្រេងនៅក្នុងដែនសមុទ្រភាគខាងលិចនៃមហាសាគរប៉ាស៊ីហ្វិកដើម្បីបង្អួតអានុភាពនៃកម្លាំងសាមគ្គីខាងវិស័យយោធារវាងប្រទេសទាំង៣អោយប្រទេស ប្រទេសកូរ៉េខាងជើងបានឃើញនិងខ្លាំងរអារ ។ តែផ្ទុយទៅវិញ កូរ៉េខាងជើងមិនបានខ្លាចរអារឫកោតញញើតចំពោះការរួមកម្លាំងគ្នារវាងប្រទេសទាំង៣នោះទេ ដោយកូរ៉េខាងជើងថែមទាំងគម្រាមបាញ់កំទេចនាវាចម្បាំងរបស់ ក្រុមប្រទេសទាំង៣ និងចង់បាញ់ពន្លិចនាវាដឹកយន្តហោះចម្បាំង Carl Vinson របស់អាមេរិក ថែមទៀតផង ។ នៅថ្ងៃចន្ទទី២៤ខែមេសាឆ្នាំ២០១៧នេះ ភាពតានតឹងនៅក្នុងឧបទ្វីបកូរ៉េបានកើនឡើង យ៉ាងខ្លាំង ដោយភាគីជម្លោះគឺអាមេរិកនិងកូរ៉េខាងជើង នៅតែបន្តគម្រាមបាញ់ប្រហារគ្នាទៅវិ ញទៅមកឥតឈប់ឈរ ។ សូមរំលឹកជូនថា កាលពីថ្ងៃអាទិត្យទី២៣ខែមេសាដដែលនេះប្រទេសកូរ៉េខាងត្បូងបាន បង្កើនកម្រិតគ្រាអាសន្នខាងសន្តិសុខយ៉ាងខ្លាំង ខណៈដែលប្រទេសចិនដែលជាប្រទេសជិត ខាងកូរ៉េខាងជើង បានប្រមូលផ្តុំកងកម្លាំងយោធានៅតាមព្រំដែនជាប់ជាមួយកូរ៉េខាងជើងនិង បានចល័តកងទ័ពខុសប្រក្រតី ។ចំណែកប្រទេសរុស្ស៊ី ដែលជាប្រទេសជិតខាងកូរ៉េខាងជើងនិងជាប្រទេសសម្ព័ន្ធមិត្តកូរ៉េខាងជើងដែរនោះ ក៏បានបញ្ជូនគ្រឿងយុទ្ធោបករណ៏និងកងកម្លាំងយោធារបស់ខ្លួនទៅកាន់ តំបន់ព្រំដែនជាប់ជាមួយកូរ៉េខាងជើងដែរ ។ បន្ទាប់ពីបានស្ងប់ស្ងាត់បន្តិចបានពីរបីថ្ងៃ ស្ថានភាពក្នុងឧបទ្វីកូរ៉េ ហាក់កំពុងចាប់ប៉ោងតឹងជាថ្មីក្នុងខណៈដែលអាមេរិកបានប្រកាសថា កងនាវាផ្ទុកយន្តហោះនិងនាវាចម្បាំង Carl Vinson នឹងទៅដល់ឧបទ្វីបកូរ៉េ នៅក្នុងពេលឆាប់ៗយោធាចិនមានសកម្មភាពខុសប្រក្រតី ឯកូរ៉េខាងត្បូងវិញបានប្រកាសពង្រឹងកំរិតស្ថានភាពអាសន្នជាថ្មីបន្ថែមទៀតដើម្បីជាកិច្ចការពារ។ព្រោះនៅសប្តាហ៍ក្រោយនេះ បងប្អូនជាគូសត្រូវខាងជើងត្រូវប្រារព្វពីធីបុណ្យដ៏សំខាន់មួយទៀត។ ដូច្នេះវាពិតជាឱកាសថ្មីមួយទៀត សម្រាប់របបព្យុងយ៉ាង បញ្ចេញសាច់ដុំពោលគឺនឹងអាចមានការសាកល្បងមីស៊ីលឬការបាញ់នុយក្លេអ៊ែរជាលើកទី៦ផង។ នៅថ្ងៃអង្គារទី២៥ខែមេសាស្អែកនេះ ព្យុងយ៉ាងត្រូវប្រារព្វខួប៨៥ឆ្នាំនៃការបង្កើត “កងទ័ពប្រជាមានិត”។ ក្នុងឱកាសបែបនេះ កូរ៉េខាងជើងតែងតែយកលេសអបអរថ្ងៃបុណ្យ ដើម្បីបង្ហាញអំពីសមត្ថភាពយោធានិងនុយក្លេអ៊ែររបស់ខ្លួន តាមរយៈការបាញ់សាកល្បងមីស៊ីលឬបាញ់សាកល្បងនុយក្លេអ៊ែរជាលើកទី៦។ ប៉ុន្តែអាចមានហេតុផលសំខាន់មួយទៀតដែលមកពង្រឹងសម្មតិកម្មរបស់កូរ៉េខាងត្បូងឱ្យពង្រឹងកំរិតអាសន្នគឺសហរដ្ឋអាមេរិកសង្កេតឃើញមានសកម្មភាពមិនប្រក្រតីរបស់កងទ័ពទម្លាក់គ្រាប់បែកចិន។ មានសកម្មភាពប្លែកយ៉ាងដូច្នេះមានន័យថាទាហានចិនក៏កំពុងស្ថិតក្នុងស្ថានភាពត្រៀមអាសន្នដែរ ? តើជាត្រៀមអាសន្នអ្វីទៅ ? នៅក្នុងសន្និសីទកាសែត ប្រធានាធិបតីអាមេរិក លោក ដូណាល់ ត្រាំបានលើកឡើងថា ទាហានចិនមានសកម្មភាពប្លែកខ្លាំខុសពីទម្លាប់មែនទែន នារយៈពេលប៉ុន្មានម៉ោងចុងក្រោយនេះ។លោកត្រាំជឿជាក់ក្នុងចិត្តថា ប្រធានាធិបតីចិន ស៊ីជីនពីងទំនងជាកំពុងសាកល្បងដាក់គំនាបលើសម្ព័ន្ធមិត្តជិតខាងកូរ៉េខាងជើង។ប៉ុន្តែគ្មានអ្នកទទួលខុសត្រូវយោធាអាមេរិកណាម្នាក់និយាយអំពីបញ្ហានេះ ឬខ្វល់ខ្វាយឬដឹងអំពីមូលហេតុច្បាស់លល់ទាក់ទងនឹងការធ្វើសកម្មភាពខ្លាំងប្លែករបស់ទាហានចិនឡើយ។ ប្រឈមមុខនឹងស្ថានការណ៍បែបនេះរដ្ឋមន្ត្រីការពារជាតិចិនមិនអាចបិទមាត់នៅស្ងៀមបានឡើយ។ក្រសួងការពារជាតិបានចេញមុខបដិសេធថាគ្មានការត្រៀមអាសន្នអ្វីមួយឡើយ! ការប្រមូលផ្តុំកម្លាំងនៅតាមព្រំដែនជាប់កូរ៉េខាងជើង គឺជាការត្រៀមរៀបចំនិងហាត់សមធម្មតាតែប៉ុណ្ណោះ។ អ្នកនាំពាក្យក្រសួងការបរទេសចិន បានគូសបញ្ជាក់ជាថ្មីថាប្រមុខដឹកនាំស៊ីជីនពីងបានជួបពិភាក្សាស៊ីជម្រៅស្តីពីបញ្ហាកូរ៉េខាងជើងជាមួយប្រធានាធិបតីអាមេរិក លោក ដូណាល់ ត្រាំរួចហើយ កាលនៅផ្លរីដា។ការពិភាក្សាជាន់ខ្ពស់ដែលជំរុញឱ្យអាមេរិកបានយល់ច្បាស់ អំពីជំហរចិន និងការខិតខំប្រឹងប្រែងរបស់ចិន។ សារព័ត៌មានផ្លូវការចិន ជាភាសាអង់គ្លេសងចិនបានសរសេរថាមានចំណុចសង្ឃឹមទៅបញ្ចុះបញ្ចូលព្យុងយ៉ាងបោះបង់កម្មវិធីនុយក្លេអ៊ែរដោយមិនប្រើកម្លាំងយោធាបាន។ លោក ដូណាល់ ត្រាំដែលមានទម្លាប់ប្រើសំដីខ្លាំងៗបានព្រមព្រៀងត្រៀមដោះស្រាយតាមផ្លូវសន្តិវិធីដែរហើយ។ចិនក៏បានសម្តែងការរីករាយនិងឆន្ទៈចង់ធ្វើការជាមួយអាមេរិកដោះស្រាយវិបត្តិកូរ៉េខាងជើងហើយ។នេះបើតាមបទវិចារណកថារបស់កាសែត។ប៉ុន្តែបើប្រសាសន៍របស់លោកអនុប្រធានាធិបតីអាមេរិកនាពេលកំពុងបំពេញទស្សនកិច្ចមួយជុំនៅអាស៊ី លោកនៅតែប្រើពាក្យដដែលថា ដំណាក់កាលអធនជាយុទ្ធសាស្ត្ររបស់អាមេរិកបានកន្លងផុតហើយ។ ពលរដ្ឋរុស្ស៊ីនៅតំបន់ភាគខាងកើតបំផុតនៃប្រទេស បានឃើញក្បួនរថយន្តដឹកសម្ភារៈយោធាសំដៅទៅកាន់ព្រំប្រទល់កូរ៉េខាងជើង។ប៉ុន្តែអ្នកនាំពាក្យវិមានក្រេមឡាំងបានបដិសេធមិនធ្វើអត្ថាធិប្បាយអ្វីទាំងអស់។មានន័យថារុស្ស៊ីក៏ទំនងជាកំពុងត្រៀមស្ថានការណ៍ដែរ !ព្រោះរុស្ស៊ីជាប្រទេសមានព្រំដែនជាប់កូរ៉េខាងជើង។រុស្ស៊ីត្រូវតែប្រុងប្រយ័ត្ន ជាប់ជានិច្ច។ ឧបទ្វីបធ្លាក់ក្នុងភាពតានតឹងស្រាប់ទៅហើយ !សមយុទ្ធប្រចាំឆ្នាំរវាង អាមេរិកនិងកូរ៉េខាងត្បូងនឹងត្រូវបិទបញ្ចប់នៅថ្ងៃទី២៨មេសា ! សម្រាប់កូរ៉េខាងជើងសមយុទ្ធនេះជាការរៀបចំសកម្មភាពឈ្លានពាន។កន្លងមកគេក៏ធ្លាប់ឃើញព្យុងយ៉ាងបានបញ្ចេញសកម្មភាពផ្គើនតបវិញខ្លះៗដែរ។ការគំរាមកំហែងរបស់កូរ៉េខាងជើងត្រៀមបាញ់នុយក្លេអ៊ែរជាលើកទី៦នៅតែមានកំរិតខ្ពស់។ តែលើកនេះកងនាវាផ្ទុកយន្តហោះ និងនាវាចម្បាំងនុយក្លេអ៊ែរអាមេរិកកំពុងរំកិលមកកាន់តែកៀកឧបទ្វីបកូរ៉េហើយ។បើតាមសេចក្តីប្រកាសរបស់អនុប្រធានាធិបតីអាមេរិក ពីប្រទេសអូស្ត្រាលីតែប៉ុន្មានថ្ងៃទៀតទេ កងនាវាចម្បាំងអាមេរិក នឹងទៅដល់សមុទ្ទជប៉ុន។មិនមែននៅឆ្ងាយដូចថ្ងៃដែលកូរ៉េខាងជើងបាញ់មីស៊ីលបរាជ័យឡើយកាលពីថ្ងៃទី ១៦មេសាទេ។ដូច្នេះចង់មិនចង់ ដោយផ្លូវការនិងដោយចំហ ឬដោយស្ងាត់ៗប្រទេសជិតខាងជាប់កូរ៉េខាងជើងត្រូវតែព្រួយបារម្ភនិងត្រៀមសា្ថនការណ៍ ! ការពារប្រសើរជាងព្យាបាល៕ 

(សូមអានបន្ត)

ពលរដ្ឋស្នើឲ្យមានការរឹតបន្តឹងច្បាប់ចរាចរណ៍ប្រកបដោយតម្លាភាព

ភ្នំពេញ៖ ចាប់ពីដើមខែឧសភាតទៅ សមត្ថកិច្ចនឹងធ្វើការរឹតបន្តឹងច្បាប់ចរាចរណ៍ផ្លូវគោក។ ទាក់ទងការរឹតបន្តឹងច្បាប់នេះប្រជាពលរដ្ឋបានសម្តែងការគាំទ្រ ប៉ុន្តែពួកគាត់ស្នើសុំឲ្យសមត្ថកិច្ចចុះអនុវត្តច្បាប់ ប្រកបដោយតម្លាភាពដែលអាចទុកចិត្តបាន។ លោក សុង ដា ជាអ្នករត់ Pass App នៅរាជធានីភ្នំពេញបានលើកឡើងថា ការរឹតបន្តឹងច្បាប់ចរាចរណ៍ផ្លូវគោកនេះ បើធ្វើជាប់ជារៀងរហូតគឺជាការល្អបំផុត ព្រោះការដែលតែធ្វើមួយខែឬ ពីខែហើយឈប់វិញ គឺដដែលជាដដែល។ ចំពោះការផាកពិន័យវិញទោះបីការរឹតបន្តឹងលើកនេះ មានការពិន័យច្រើនជាងការរឹតបន្តឹងមុនៗក៏ដោយ លោក សុង ដា លើកឡើងថាមិនមានជាបញ្ហានោះទេ។ ជុំវិញការរឹតបន្តឹងច្បាប់ចរាចរណ៍ផ្លូវគោក បុរសអ្នករត់ Pass App ស្នើសុំឲ្យមានការអនុវត្តន៍ទៅលើគ្រប់ អ្នកធ្វើចរាចរណ៍លើដងផ្លូវ មិនថា អ្នកតូច ឬអ្នកធំ បើខុសច្បាប់ សូមត្រួពិនិត្យ និងធ្វើការពិន័យឲ្យបានត្រឹមត្រូវ ទៅតាមច្បាប់។ ចំណែកលោក សារ៉េត ជាអ្នករត់ម៉ូតូឌុបនៅម្តុំបឹងកក់បានឲ្យដឹងថា ការរឹតបន្តឹងច្បាប់ចរាចរណ៍ឲ្យបានខ្លាំងជាងមុន គឺជាចំណែកមួយជួយកាត់បន្ថយការបើកបរស្ថិតក្រោមស្ថានភាពស្រវឹង ដែលអាចបណ្តាលឲ្យមានគ្រោះថ្នាក់ ចរាចរណ៍ទៅលើអ្នកផ្សេងដែលគ្មានកំហុស។​ អ្នករត់ម៉ូតូឌុបម្នាក់ទៀតនៅក្បែរនោះ ដែលសុំមិនបញ្ចេញឈ្មោះ បានលើកឡើងថា ដើម្បីចៀសឆ្ងាយ ពីការផាក ពិន័យនៃការរឹតបន្តឹងច្បាប់ចរាចរណ៍ផ្លូវគោកលើកនេះ យើងគ្រប់គ្នាត្រូវតែចូលរួមគោរពច្បាប់រាល់ពេល ធ្វើដំណើរមិនថាទីជិត ឬឆ្ងាយឡើយ។ យ៉ាងណាក៏ដោយ សេចក្តីជូនដំណឹងរបស់អគ្គស្នងការនគរបាលជាតិ នៅថ្ងៃទី២៨ ខែមេសាឆ្នាំ២០២០នេះបានគូសបញ្ជាក់ថា កម្លាំងនគរបាលចរាចរណ៍ផ្លូវគោក នៅទូទាំងប្រទេស នឹងអនុវត្តច្បាប់ស្តីពីចរាចរណ៍ផ្លូវគោក ដោយស្មារតីទទួលខុសត្រូវ តម្លាភាព គ្មានការលើកលែង និងមានសីលធម៌វិជ្ជាជីវៈ ព្រមទាំងឥរិយាបថថ្លៃថ្នូរ ទន់ភ្លន់ និងម៉ឺងម៉ាត់។ ជុំវិញការរឹតបន្តឹងច្បាប់ចរាចរណ៍ផ្លូវគោកនេះដែរ សម្តេចតេជោនាយករដ្ឋមន្ត្រី ថ្លែងថា ការរឹតបន្តឹងច្បាប់ចរាចរណ៍ផ្លូវគោក គឺដើម្បីធានាសុវត្ថិភាពអាយុជីវិតបងប្អូនប្រជាពលរដ្ឋនៅទូទាំងប្រទេស ដើម្បីចៀសវាងគ្រោះថ្នាក់ផ្សេងៗដែលអាចបង្ករបួសស្នាមធ្ងន់ស្រាលរហូតដល់មានការបាត់បង់អាយុជីវិតទៀតផង។ សម្តេចលើកឡើងថា យើងមិនចង់ឃើញករណីគ្រោះថ្នាក់ចរាចរណ៍ កើតមាននៅក្នុងក្រុមគ្រួសាររបស់បងប្អូនណាម្នាក់ឡើយ។ សម្តេចប្រមុខរាជរដ្ឋាភិបាលបានក្រើនរំឮកដល់ បងប្អូនប្រជាពលរដ្ឋ ជាពិសេសយុវជន មុននឹងបើកបររថយន្តត្រូវមានបណ្ណបើកបរពិតប្រាកដត្រឹមត្រូវ។ រីឯរថយន្តវិញត្រូវបង់ពន្ធ និងបង់ថ្លៃសេវាផ្សេងៗអោយបានត្រឹមត្រូវមុននឹងបញ្ជាយានយន្តនៅលើដងផ្លូវសាធារណៈ។ សម្តេចនាយករដ្ឋមន្ត្រី ក៏បានស្នើឲ្យបងប្អូនប្រជាពលរដ្ឋ និងយុវជន បើកបរដោយមានការប្រុងប្រយ័ត្នខ្ពស់ ជាមួយនឹងការយោគយល់ដល់គ្នាទៅវិញទៅមកដើម្បីសុខសុវត្ថិភាពទាំងអស់គ្នានៅទូទាំងប្រទេសផងដែរ។ សូមជម្រាបថា ការរឹតបន្តឹងច្បាប់ចរាចរណ៍ផ្លូវគោក នឹងមានការផាកពិន័យធ្ងន់ធ្ងរជាងពេលមុនៗ TNAOT APP សូមជម្រាបជូនខ្លះៗថា ការបើកបរមិនគោរពផ្លាកសញ្ញាហាមឃាត់ ឬផ្លាកសញ្ញាបញ្ជា ឬសិទ្ធអាទិភាព ឬគំនូសថ្មើរជើងឆ្លងកាត់ រថយន្តធុនស្រាល ត្រូវពិន័យ ១៥០០០០រៀល (១៥ម៉ឺនរៀល) រថយន្តធុនធ្ងន់ ត្រូវពិន័យ៣០ ០០០០០ (៣០ម៉ឺនរៀល) ប្តូរពណ៌យានយន្តដោយគ្មានការអនុញ្ញាត ឬបិទពណ៌មិនត្រឹមត្រូវតាមបណ្ណសម្គាល់យានយន្ត រថយន្តធុនស្រាល ត្រូវពិន័យ១៨ ០០០០ (១៨ម៉ឺនរៀល) រថយន្តធុនធ្ងន់ ត្រូវពិន័យ ៣៧ ៥០០០រៀល (៣៧ម៉ឺន ៥ពាន់រៀល) អ្នកបើកបរក្នុងស្ថានភាពស្រវឹង រថយន្តធុនស្រាល ត្រូវពិន័យ ៤០ ០០០០រៀល(៤០ម៉ឺន) រថយន្តធុនធ្ងន់ ត្រូវពិន័យ ៨០ ០០០០រៀល (៨០ម៉ឺន) រួមជាមួយការពិន័យលើការល្មើសច្បាប់ផ្សេងៗទៀតជាច្រើនផងដែរ ៕

(សូមអានបន្ត)

នាយករដ្ឋមន្ត្រី អំពាវនាវឱ្យពលរដ្ឋចូលរួមគោរពច្បាប់ចរាចរណ៍ ដើម្បីសុវត្ថិភាពទាំងអស់គ្នា

សម្ដេចនាយករដ្ឋមន្ត្រី ហ៊ុន សែន តាមរយៈហ្វេសប៊ុករបស់ខ្លួន នៅថ្ងៃទី២៩ ខែមេសា ឆ្នាំ២០២០នេះ បានអំពាវនាវទៅដល់ប្រជាពលរដ្ឋ ជាពិសេសយុវជន មុននឹងបើកបររថយន្តត្រូវមានបណ្ណបើកបរពិតប្រាកដត្រឹមត្រូវ។ រីឯរថយន្តវិញត្រូវបង់ពន្ធ និងបង់ថ្លៃសេវាផ្សេងៗឱ្យបានត្រឹមត្រូវមុននឹងបញ្ជាយានយន្តនៅលើដងផ្លូវសាធារណៈ។ ការអំពាវនាវនេះធ្វើឡើងបន្ទាប់ពីកម្ពុជារឹតបន្តឹងការអនុវត្តច្បាប់ស្ដីពី ចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ចរាចរណ៍ដែលមានកំណើនយ៉ាងកំហុក នាឆ្នាំ២០១៩ កន្លងមក។ បើតាមសម្ដេចនាយករដ្ឋមន្ត្រី ការរឹតបន្តឹងច្បាប់ចរាចរណ៍ទូទាំងប្រទេសនេះ គឺដើម្បីធានាសុវត្ថិភាពអាយុជីវិតបងប្អូនប្រជាពលរដ្ឋនៅទូទាំងប្រទេស ដើម្បីចៀសវាងគ្រោះថ្នាក់ផ្សេងៗដែលអាចបង្ករបួសស្នាមធ្ងន់ស្រាលរហូតដល់មានការបាត់បង់អាយុជីវិតទៀតផង។ សម្ដេចនាយករដ្ឋមន្ត្រីមានប្រសាសន៍ថា «យើងមិនចង់ឃើញករណីគ្រោះថ្នាក់ចរាចរណ៍កើតមាននៅក្នុងក្រុមគ្រួសាររបស់បងប្អូនណាម្នាក់ឡើយ»។ ជាថ្មីម្ដងទៀត សម្ដេចនាយករដ្ឋមន្ត្រី ហ៊ុន សែន បានទទូចឱ្យប្រជាពលរដ្ឋ និងយុវជនបើកបរដោយមានការប្រុងប្រយ័ត្នខ្ពស់ ការយោគយល់ដល់គ្នាទៅវិញទៅមក ដើម្បីសុខសុវត្ថិភាពទាំងអស់គ្នានៅទូទាំងប្រទេស។ ជុំវិញបញ្ហាច្បាប់ចរាចរណ៍នេះ ក្រសួងសាធារណការ និងដឹកជញ្ជូន កាលពីពេលថ្មីនេះៗ បានកំណតយកថ្ងៃទី១ ខែឧសភា ឆ្នាំ២០២០ ដើម្បីធ្វើការអនុវត្តការពិន័យអន្តរការណ៍ ចំពោះអំពើល្មើសនឹងច្បាប់ចរាចរណ៍តាមអនុក្រឹត្យថ្មី ដែលត្រូវពិន័យជាទឹកប្រាក់បានដំឡើងពី៣ ទៅ ៥ដង។ បើតាមគណៈកម្មាធិការជាតិសុវត្តិភាពចរាចរណ៍ផ្លូវគោក បានជំរុញការរឹតបន្តឹងការអនុវត្តច្បាប់យ៉ាងសកម្មនៅទូទាំងប្រទេស បានធ្វើឱ្យគ្រោះថ្នាក់ចរាចរណ៍ថយចុះចំនួន១៥០លើក ស្មើ១៤% ចំនួនអ្នកស្លាប់ថយចុះ២០នាក់ ស្មើ៤% និងចំនួនអ្នករបួសថយចុះ២៧៧នាក់ ស្មើរ១៧% បើធៀបត្រីមាសទី១ ឆ្នាំ២០១៩។ ដូចសម្ដេចនាយករដ្ឋមន្ត្រីដែរ គណៈកម្មាធិការជាតិសុវត្តិភាពចរាចរណ៍ផ្លូវគោក បានអំពាវនាវទៅដល់សាធារណៈជនដែលប្រើប្រាសផ្លូវត្រូវចូលរួមគោរពច្បាប់ចរាចរណ៍ផ្លូវគោក ដើម្បីការពារអាយុជីវិតខ្លួនឯង និងអ្នកដទៃ ប្រកបដោយឆន្ទៈភ្ញាក់រលឹកខ្ពស់ សំដៅលើកស្ទួយកិត្តិយសជាតិ៕

(សូមអានបន្ត)